نصائح من ذهب

• =انا قلبي مهموم و مافيش حد حاسس بيا اعمل اية ؟

• • قال تعالي " إِنَّهُ يَعْلَمُ الْجَهْرَ وَمَا يَخْفَىٰ "
  

• ايه بتهون كتير عليك , بتهون عليك إن الله " يعلم " , إنه الوحيد الـى يعلم الحقيقه كامله , الوحيد الى عالم بالى حصل في حياتك

قال تعالي "فَاتَّخِذْهُ وَكِيلًا "

لما بتحكي مشكلتك لحد ثقة بتروح تنام مطمن جداً مع ان المشكلة لسه ماتحلتش بس فكرة انها مع حد ثقه هيعرف يتصرف بطمنك ، ابدأ يومك بنفس البدايه دي ، اطمن ان امرك بأيد ربك " فأتخذه وكيلا " ، اعمل لربك توكيل لكل امور حياتك رزقك و حلمك و كل الـى انت محتاجه ، و اطمئن ، فأنت مع الله ، مع القوه التي لا تغلب ، و قولها من قلبك :
" حسبي الله لا اله الا هو عليه توكلت ، و هو رب العرش العظيم "




= انا اتظلمت كتير و خايف من اذي الناس اللي حواليا

قال تعالي :
" إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آتِنَا مِنْ لَدُنْكَ رَحْمَةً "
في سورة الكهف ان ربنا أواهم من الى ظلمهم أواهم في كهف ؟
يعني مكان بلا باب ؟
و مافيش انسان قدر يلمسهم ولا يقرب منهم !
• ردد بكل قوة و يقين مع كل احساس بالقلق من شخص او شيء ..
بسم الله الحفيظ احفظني
بسم الله الحفيظ احميني
بسم الله الحفيظ نجيني



" اصبحنا و اصبح المُلك لله "

ابدأ يومك و انت حاسس كل الملك و النعم لله وحدهُ ..
لان مفيش حد في ايديه يساعدك ولا يفيدك ولا يوفقك للـى انت عايزه غير ربك
اصبحتُ علي اسم الله " الرزاق "و قد رجوتك يا رزاق ذو القوة المتين ان توسع لي رزقي من "الأمل " ، فـ املأ قلبي به ، فـ ذاك الرزق هو بابُ الحياه ، و انت خير الرازقين
صباح التوكل علي الله



= انا حاسة ان مجهودي ضاع و مهما اعمل مافيش تقدير

• قال تعالي { قُلْ كَفَى بِاَللَّهِ شَهِيدًا بَيْنِي وَبَيْنكُمْ َ }
• قال تعالي { وَكَلْبُهُمْ بَاسِطٌ ذِرَاعَيْهِ بِالْوَصِيدِ }
" كم من مشهـور في السماء , مغمور في الارض "
انتي عمرك خدتي بالك في سورة الكهف ان ربنا ذكر
"الكلب " .. و ماتكلمش عن الملك ؟!
تخيلى الحيوان ده إسمه أتخلد في القرآن و الملك لأ ؟!
دة يعلمني و يعلمك ان مش لازم الناس تكون عارفه انتى عملتى ايه .. و بتعملى ايه .. و تعبتى قد ايه .. و بتتعبى قد ايه .. و هتتعبى قد ايه .. مش لازم صدقيني ..
" يكفي بإن الله يعلم " ..
أصل يعني الناس عرفت ؟ تمام .. ايه ال هيحصل ؟ .. هيقولو فيكى كلمتين حلوين ؟
و خلاص هينسوا .. لا هايملكوا ضر ولا نفع ليكي ..
" إذا علم الله حقيقتك , فلا يضرك أن تكوني مجهولة "
= عملك مش بيضيع .. الله شهيد يشهد علي كل شيء .. خليك مخلصة .. و توكلى على الله .. =
قولي دائما " كفى بالله شهيدا "



=انا بمر بكرب و ضيق شديد و حاسس بالوحدة و مافيش حد بيسمعني

• قال تعالي " فَاسْتَجَبْنَا لَهُ وَنَجَّيْنَاهُ مِنَ الْغَمِّ ۚ َ "
اية تطمن قلبك مع كل مرة بتحس بشدة و تحس ان الناس بعدت عنك ، قربك من الله هو الحاجه الوحيدة اللي هتريحك وتسعدك ، لانة { قريب ، مجيب }
يعنى انت مش محتاج حد ولا تقولى مش لاقي حد يسمعنى انت معاك الله القريب المجيب
ادعي و انت شايف اسم المُجيب قدامك
( فأستجبنا له ) يعني أستجابه مؤكده باذن الله



= انا حاسس من جوايا اني مدمر نفسيا و تعبت خلاص

أخطر حاجه إنك تنهزم من " جواك " مش عوامل خارجيه ..
أنت مؤمن بالله و عندك يقين بيه لما تتقوى بالله حتى لو ضعفت و أتوجعت و أتكسرت ما ده طبيعي يحصل , بس عارف بيحصل ليه ؟!
عشان تحتاج لربك و تعرفة بأسمائه و صفاتة
فـتجري عليه و تلجأ له من ضعفك لقوته .. " القوى "
من فقرك لـ غناه .." الغني "
من ذلُك لـ عزه .. " العزيز "
من ضعفك و كسرتك لـ رحمته الواسعه .. " الرحيم "
منك ليه هو .. " القريب " فـتقوى من جواك تاني بسرعه و تبدأ تشوف هتعمل ايه و هاتتصرف إزاي و هو يعينك و يسخرلك كل اسباب تساعدك هو جنبك مش هايسيبك لحظه , هو مش بيسيبك أصلاً حتى لو أنت نسيت , فـ ما بالك لو جريت على بابه محتاج هيعملك ايه ولا أيه ..
خليك قوي و مستغني بالله من جواك , ده " السر "




خايفة من بكرة ...
مضايقة ..
مهمومة ..

طب بصى كدة معايا ربنا بيقول اية ؟؟
و عيشى مع كل اية و اطلعى بيها بأسم من اسمائة الحسني ..
قال تعالي ( فَمَا ظَنُّكُم بِرَبِّ الْعَالَمِينَ )
كم مرة بتبقى هتغرقى خلاص، و بينقذك ، فتفرحى أوي ، و تيجي تغرقى تاني فينقذك و في كل ضيق و في كل كرب بحسن ظنك و تسليمك لله كان دايما بيفرجها عليك ..
* اسم الله ( الوكيل )

____________________________

قال تعالي " أَمَّا السَّفِينَةُ فَكَانَتْ لِمَسَاكِينَ يَعْمَلُونَ فِي الْبَحْرِ فَأَرَدْتُ أَنْ أَعِيبَهَا "
كل عيب او ضيق من تقدير الله دايما هتلاقي وراءه حكمة و رحمة من إرادة الله .
*اسم الله ( الحكيم )
_________________________
قال تعالى ( لا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا )
لولا هذهِ الأية لماتت بعض القلوب همًا
*اسم الله ( المدبر )
__________________________
قال تعالي " وَلَسَوْفَ يُعْطِيكَ رَبُّكَ فَتَرْضَى "
و كأنها يد حانية تمسح على كل من قُهر قلبه
*اسم الله (الجبار )
________________
كل موقف في حياتك هتلاقي اسم من اسماء الله بيعبر عنة و دة بيكون الاسم الاعظم اللي بتحتاجية عشان تدعي بية ..
اسماء الله الحسني هي اللي بيسير تحتها كل ذبذبات و ترددات الكون ... وهي فطرة الخير اللي جوة كل انسان
... لو ادركتي معني انك خليفة الله علي الارض و فيكى نفخة من روحة و تأملتى اسم الله ( الواسع ) بالتأكيد هتشوفى كل شيء في حياتك بمنتهي الوعي و الجمال ودة يوصلك بسرعة لكل الخير و اليسر ..




"يُدبّرُ الأمر"

أكتر أية بتخلي قلبك يطمن و دوشة دماغك تقفّ ، و حكاية ضيقك و مشكلتك دلوقتي ، هي قصة " تدبير الفرج " هتحكيها لغيرك بعدين و تأخير استجابة دعائك ده في تدبير " توقيت " بيتم دلوقتي باذن الله , بيفرحنا ساعة الاجابه ازاي اترتبت في التوقيت ده و بالطريقه دي ، اصبر و ماتبطلش تدعي ، كل دعوه بتدعيها بتجمل التوقيت اكتر ، و الاجابة بتبقي أكرم مما في خيالك ، شوف تدبير اخوة يوسف عليه السلام للتخلص منه هو نفس تدبير الله لتمكينه ، دة يعلمك ان مع ُ كل قصة فرج بتسمعها ، و تتأمل في جمال تدبير ربك في الموقف ، تثق ان فعلاً : لو كشف لي غطاءُ الغيب ما أزددتُ في الله الا يقين
عشان يبقى " الاول " في زمانه
فمتحطش نقطه دلوقتى و تنهي قصتك , للقصه بقيه ,
و اللهُ يبدل الاحوال
﴿ لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا ﴾



• الناس بقت قاسية اوي و حاسس بالوحدة •

= قال تعالي " وَحَنَانًا مِّن لَّدُنَّا "
لو جة عليك وقت وحسيت انك مفتقد حاجة في حياتك ..، دور كويس هتلاقي ربنا معوضك بنفس اللي انت محتاجة بس من باب تاني .،
من كتر ما احنا مركزين علي اللي ناقصنا مش شايفين ابواب الجمال و الخير كلها ..
ممكن انتي تكوني بنت جميلة و رقيقة مفتقدة امان و حماية الاب هتلاقي ربنا معوضك بأخ طيب القلب او اخت حنينة ..
ولو مفتقدة دفيء اللمة مع اخواتك هتلاقي ربنا رزقك بناس بتحبك من قلبها او صديقة وفية ..
ولو انت زوج و مفتقد بهجة الاولاد هتلاقي اللي بيعتبروك زي والدهم و مهتمين ازاي يسعدوك و يخلوا بالهم منك و يخافوا عليك..
ولو انتي مفتقدة دعوة الام او الاب هتلاقي اللي بيدعيلك بظهر الغيب من غير ما تعرفي ..
الدنيا مترتبة بحكمة شديدة بس احنا اوقات بنقفل قلوبنا و بصيرتنا عن خير ربنا و رزقة و حنانة ..
ربي اغفر لنا و انر قلوبنا بنورك و ارزقنا حنانا من لدنك

(اسماء الله الحسني )

لما الدنيا تقفل و الهم يزيد ..

ناجيه بإسمه ( السلام ).. يرزقك السلام النفسي و السكينه .. و السلام مع كل الناس .

ناجيه بإسمه ( البصير ) .. لما تتوه في النوايا .. و ماتفهمش حقايق الأمور .. و تبقى مش فاهم ال بيدور حواليك .

ناجيه بإسمه ( النور ) .. لما تضلم الدنيا .. و تبقى مش شايف ملامح الطريق .

ناجية باسمه ( الهادي ) .. اما الاختيارات تكتر .. و دماغك تودي و تجيب .. و تبقى مش عارف تمشي منين .

ناجيه باسمه ( الحكيم ).. يرزقك الحكمه عشان تعرف تتصرف .. و تفهم الدنيا .. و تشوفها صح .

ناجيه باسمه ( القادر) .. لما يتقالك مُستحيل .. لما تبقى عايز قوه تعينك .. لما تبقى عايز توصل مهما حصل .

ناجيه بإسمه ( الجبار ) .. لما قلبك يتكسر .. و يتداس على حقك .. و الظلم يطولك ،

ناجيه بإسمه ( الحي ) .. لما قلبك يموت منه اجزاء غصب عنك .. يا بسبب ذنوب .. او بسبب خذلان ..

ناجيه بإسمه ( الودود ) .. لما اقرب الناس تسيبك .. و تهجرك .. و تلاقي مفيش أنيس .

ناجيه بإسمه ( القوي ) .. لما تضعف .. او تحس انك هتقع .. و تحس ان كل حاجه بتهد فيك .

قال تعالى (( و للهِ الأسماءُ الحُسنى فأدعوهُ بها ))

اطمئن .. لانه الله

عندما اراد الله ان ينجي سيدنا ابراهيم من النار ، مابعتش امطار تطفيها ، لكن خلي النار نفسها بردا و سلاما علي جسد ابراهيم

عندما اراد الله ان ينجي سيدنا يونس من ظلمات البحر وبطن الحوت حول الحوت نفسة الي مركب ينقلة من قاع المحيط الي الشاطيء

و قميص سيدنا يوسف اللي كان السبب في أن سيدنا يعقوب يبكي و يفقد بصرة و بعد فترة بقي هو سبب انة يرجع بصرة تاني و يفرح

و سيدنا عيسي لما اتولد و السيدة مريم اتمنت الموت لكن بعدها بفترة بقي نبي و بسبب معجزتة اصبحت سعيدة و سيدة من سيدات الجنة يذكر اسمها الي قيام الساعة

يعني

حين يأذن الله القادر بالفرج ..

يأمر حزنك.. مرضك.. خوفك.. فقرك.. أن يتحول الي فرج

واسباب ألمك تتحول لأسباب املك .. والمحنة تتحول لمنحة .. و التدمير يصبح تدبير .. و التأخير ليك تأهيل ..

" القادر "

ربك قادر على :

" إيجاد المعدوم " زي انه رزق زكريا الولد من غير ما يملك اسباب الرزق ده ، كانت اسباب معدومه

و" أعدام الموجود " زي النار جت عند سيدنا ابراهيم و اصبحت برداً و سلاماً

و رب زكريا و ابراهيم هو ربك ، وربك قادر يبدل حالك و كربك ، قادر يبدل همك و حزنك ، قادر يطمن قلبك بعد التعب و الخوف ، قادر يجمع البعيد ، قادر علي كل شيء ، لانة الله القادر سبحانه

كل فرصة بتروح ..

كل شخص سابك ..

كل حاجة تعبتي عليها و باظت ..

كل خطوة كان نفسك تتم بس محصلش ..

بشري نفسك بـالأية دي

" عَسَىٰ رَبُّنَا أَن يُبْدِلَنَا خَيْرًا مِّنْهَا إِنَّا إِلَىٰ رَبِّنَا رَاغِبُونَ "

| القلم ٣٢ |

ردديها من قلبك ، و تعلقي بيها ، و ابشري سيُدهشك بعطاءه

قال تعالي " وَآتَاكُم مِّن كُلِّ مَا سَأَلْتُمُوهُ "

تصبحوا على شعور هذه الآية



إيهاب سعد الدين