ملتقى أحبة القرآن - جدول العبادات في الدورة الرمضانيه

اولا يا اختي هتبدأي بالتوبه النصوحه وتجديد النيه مع ربنا انك هتدخلي رمضان ونيتك الصيام والقيام والعباده ونيتك من ده رضا ربك والنجاه من النار والفوز باعلي درجات الجنه كمان وانتي بتعملي الاكل في رمضان خلي نيتك افطار صايمين علشان تاخدي اجرهم

تعالي شوفي بقي تنظمي وقتك ازاي

هيبقي في ثوابت نتفق كلنا انها هتبقي موجوده مهما حصل تحاولي جاهده انك تحافظي عليها وكل واحده تعملها في الوقت اللي هي فاضيه فيه كل واحده حسب ظروفها

ايه هي الثوابت دي:

اولا في 3ساعات يوميا لازم تسعي جاهده انك تجتهدي فيهم جدا لانهم من افضل الاوقات في اليوم

1-ساعه قبل الفجر (وقت السحر ) وبالاسحار هم يستغفرون ثواب الاستغفار والذكر والصلاة والقران والدعاء في وقت السحر ثواب عظيم مش عايزين نخسره

2-ساعه بعد الفجر من صلي الفجر في جماعه وجلس يذكر حتي الشروق وصلي الضحي له اجر حجه وعمره مش عايزين نخسر اجر 30حجه وعمرة كل يوم في رمضان

3-ساعه الغروب اخر ساعه قبل المغرب هتقولي هنبقي بنحضر الفطار هقولك جهزي اكلك واعملي حسابك تخلصيه بعد العصر وتبقي قبل المغرب ب10دقايق تنهي الساعه او نص ساعه لو مقدرتيش تكملي الساعه في الوقت ده

ثانيا الذكر في رمضان

للذكر انواع كثيرة ومختلفه
الذكر بالاستغفار الاستغفار بيجلب رضا الرحمن وبيوسع الرزق وبيرزق الاطفال والاموال
استغفرو ربكم انه كان غفارا يرسل السماء عليكم مدرارا ويمددكم باموال وبنين ويجعل لكم جنات ويجعل لكم انهار
الذكر بالتسبيح فانتي لو قلتي سبحان الله وبحمده 100مرة غفرت ذنوبك ولو كانت مثل زبد البحر عارفه زبد البحر ده قد ايه اقفي قدام البحر واتفرجي علي الامواج والجزء الابيض الكبير علي علي وش الميا ده
انتي لو قلتي لااله الا الله وحده لا شريك له له الملك وله الحمد وهو علي كل شيئ قدير 100مرة كانت حرز ليكي من الشيطان
لوقلتي سبحان الله وبحمده سبحان الله العظيم ثقل ميزانك
لاحولا ولا قوة الا بالله كنز من كنوز الجنه
لااله الا الله لوقلتيها بصدق تخلي ميزانك يتقل يوم القيامه
سبحان الله والحمد لله والله اكبر
اجعلي لسانك رطب بذكر الله وانتي بتطبخي وانتي في المواصلات وانتي بترتبي شقتك وانتي
راجعه من شغلك وانتي في مواصله وانتي بتغسلي المواعين اذكري الله بالتسبيحات وانواعها الكثيره

حافظي علي اذكار الصباح والمساء

حافظي علي اذكار النوم واذكار الاستيقاظ

حافظي علي اذكار الدخول والخروج من الحمام

هاتي ورق واكتبي الاذكار دي بشكل حلو او اشتريها استيكارات وعلقيها في البيت علي باب الحمام
عند سريرك في اوضه المعيشه بتاعت البيت علشان البيت كله يفتكرها ويقولها وتاخدي ثوابهم معاكي خليكي تاجره حسنات بقي وزودي الورق اللي بتعمليه او الاستيكارات بتاعه الاذكار دي ووزعيها علي اصحابك او للناس وانتي بتصلي التراويح يلزقوها في بيتهم علشان تاخدي ثواب كل حد هيقولها

ثالثا السواك

بصي بقي السواك ده سنه الرسول قال عنها مطهرة للفم ومرضاه للرب اشتري سواكات كتير ووزعيها علي اصحابك وقرايبك واحتسبي في ده احياء سنه مهجورة وتخيلي كل حد ياخده
او يعمل زيك ويشتريه ويوزعه هتاخدي بيه ثواب احياء سنه خليكي تاجره حسنات
هيجي علينا يوم هنتمني فيه ولو حسنه واحده
وزودي نواياكي في العمل الواحد علشان تاخدي اجور النوايا كلها الصحابه كانو تجار نوايا

رابعا الدعاء

الدعاء من العبادات اللي ربنا بيحبها قوي لانها اعتراف منك بضعفك قدام قدرته وتلجائي ليه علشان يقضيلك حجتك وتتوددي ليه علشان تاخدي حاجتك

قسمي دعائك
لنفسك خلي طموحك في الدعاء لنفسك عالي يعني اسالي الله الفردوس الاعلي ومرافقه النبي في الجنه
وادعي بالالحاح شوفي ايه اكتر حاجه مضايقاكي في نفسك في طباعك وادعي ربنا يغيرك
ادعي بكل حاجه نفسك فيها

وادعي لاهلك متنسيش من علامات البر للوالدين الدعاء لهم اذا مات ابن ادم انقطع عمله الا من ثلاث منهم ولدا صالح يدعي له ادعو لابائكم وامهاتكم سواء كانوا احياء او اموات
ادعو لاخواتكو وولاد اخواتكو وقريبكو كل عيلتكو

ادعو لاصحابكو الدعاء بضهر الغيب مستجاب وفي ملاك بيقولك ولك بمثل ما دعيت

ادعو لبلادكو ادعو للامه الاسلاميه
ادعو واستغفروا للاموات فيوم هتكوني مكانهم ومحتاجه حد يدعيلك

ادعاء لاصحاب الحقوق عليكي فاحنا طبعا اغتبنا ناس والغيبه لازم اللي اغتبتيه يسامحك فانتي توبي من الغيبه وادعي للي ليهم حقوق عليكي وادعي ربنا انهم يسامحوكي وانتي كمان سامحي اللي اغتابوكي علشان ربنا يخلي الناس تسامحك

خامسا الصلاة

هي الصلاة بين العبد وربه حاولي تخشعي فيها بجد مشكلتنا كلنا اننا بنسرح
بس اسمعي سلسله كيف تتلذذ بالصلاة علي اليويتوب وهي تساعدك باذن الله

صلي في رمضان السنن فمن صلي اثنتا عشرة تطوعا بني له بيتا في الجنه
تخيلي بقي لما تصلي 12ركعه سنه

2 +الفجر
4+الظهر+2
0+العصر+0
0+المغرب+2
0+العشاء+2
لو صلتيهم اتبني ليكي بيت في الجنه

ولو صليتي التراويح سواء لوحدك في البيت او جماعه مع بنتك او مامتك او اختك او في المسجد
كده 8ركعات +2شفع +4قيام ليل
كده 12 ركعه تانين يعني اخدتي بيتين في الجنه كل يوم
وحافظي علي ادعيه استفتاح الصلاة وغيريها جددي فيها

سادسا القران

بصي بقي انتي هتعملي خاتمه في التراويح سواء كنتي لوحدك او مع مامتك او بنتك او اختك صلي كل يوم بجزء او اختاري مسجد يكون بيصلي بجزء كده عملتي (1ختمه)

التهجد بالليل صلي التهجد بالليل بجزئين انتي لوحدك يعني متكسليش رمضان ده شهر الحسنات وهو شهر واحد بس كده هتكوني عملتي (2ختمه)

التلاوه بقي كل يوم اعملي عدد فردي يعني اول يوم تقري سورة البقرة وال عمران والنساء تاني يوم تقرائي 5سور اللي بعدهم وتالت يوم ال7سور اللي بعدهم وهكذا كده هتعملي ختمه اسبوعيه يعني (4ختمات)

كده هيخلص رمضان وانتي عامله 7ختمات